Samfélag án sóunar

Auðlindagarðurinn sem byggst hefur upp í grennd við jarðvarmaver HS Orku á Suðurnesjum er einstakur á heimsvísu, boðar nýja tíma, nýja hugsun og hvetur til enn frekari þróunar á aukinni og bættri nýtingu á því sem frá jarðvarmaverunum kemur.

HS Orka rekur nú tvo orkuver í Svartsengi og á Reykjanesi. Kjarnastarfsemi þeirra hefur verið í framleiðslu á rafmagni og heitu vatni. Afgangsstraumarnir hafa verið nýttir í ótrúlega fjölbreytta framleiðslu en þar má meðal annars nefna Bláa lónið, snyrtivöruframleiðendur, líftæknifyrirtæki og fiskeldi. Ríflega 500 störf má rekja beint til Auðlindagarðs HS Orku, auk annarra afleiddra starfa. 

Fyrirtæki Auðlindagarðsins nýta hvert um sig með beinum hætti tvo eða fleiri auðlindastrauma frá jarðvarmaverum HS Orku og verða því af augljósum ástæðum að vera staðsett á Suðurnesjum í grennd við jarðvarmaverin.
Starfsemi Auðlindagarðsins hefur byggst upp á sameiginlegum hagsmunum fyrirtækjanna, þ.e. affall eins er hráefni fyrir annan, nálægðinni og nánu þverfaglegu samstarfi.

Með Auðlindagarðinum vill HS Orka vekja fólk til umhugsunar um þær verðmætu auðlindir sem fyrirtækinu hefur verið treyst fyrir og því falið að tryggja að endist kynslóð fram af kynslóð.

Markmið Auðlindagarðsins er „Samfélag án sóunar“ það er að nýta beri alla þá auðlindastrauma sem streyma inn í og frá fyrirtækjum garðsins til fulls og á sem ábyrgastan hátt, samfélaginu til framþróunar og heilla.

Albert Albertsson

Hugmyndasmiður Auðlindagarðsins
  • Markmið Auðlindagarðsins er að nýta alla auðlindastrauma sem streyma inn í og frá fyrirtækjum garðsins á sem ábyrgastan hátt.
  • Ríflega 500 störf má rekja beint til Auðlindagarðs HS Orku, auk annarra afleiddra starfa. 
  • Afgangsstraumarnir hafa verið nýttir í ótrúlega fjölbreytta framleiðslu en þar má meðal annars nefna Bláa lónið.

Hugmyndasmiður Auðlindagarðsins

Albert Albertsson er hugmyndasmiðurinn að Auðlindagarði HS Orku. Hann fæddist árið 1948 og ólst upp við kröpp kjör hjá ömmu sinni og afa í Þingholtunum í miðbæ Reykjavíkur. Þar á bæ var engu hent. Allar afurðir voru nýttar til hins ýtrasta. Albert ungur

Sem ungur drengur varð Albert hugfanginn af indíánum og þá sérstaklega hugmyndafræði þeirra um að ættbálkarnir veiddu aldrei meira en þörf var á. Að þeir skildu eftir sig sem fæst fótspor og gengu ekki of nærri móður jörð. Indjánar

Albert heillaðist einnig af svokölluðum svartstrókum (e. black smokers) sem eru neðansjávar hverir sem spúa heitum jarðhitavökva út í kaldan sjóinn. Þótt vökvinn sé eitraður myndast fjölskrúðugt líf í kringum hann.

Þessa fallegu sýn á lífið yfirfærði Albert á Auðlindagarð HS Orku. Þar hefur í tuttugu ár verið unnið eftir kjörorðinu „Samfélag án sóunar“. Í því felst að nýta beri allar þær auðlindir sem streyma inn og út úr garðinum til fullnustu og á sem ábyrgastan hátt. Í rauninni er ekki til neitt sem heitir rusl heldur einungis hráefni – verðmætar auðlindir sem hægt er að nýta í ólíka framleiðslu.